Mga Lokasyon ng LIBRENG Pagpapasuri sa COVID-19

Dapat kayong kumuha ng COVID-19 test kung:

• Mayroon kayong mga bagong sintomas gaya ng pagkapagod, pananakit ng ulo, pananakit ng kalamnan/katawan, ubo, lagnat, pananakit ng lalamunan, at/o baradong ilong.
• Mayroon kayong mga sintomas at nasa panganib ng malubhang sakit dahil sa iba pang mga medikal na kondisyon, edad, o mayroong compromised immune system. Maaari kayong kwalipikado para sa paggamot para mabawasan ang inyong panganib sa malubhang sakit.

Isaalang-alang ang pagpapasuri kung:

• Mayroon kayong napag-alamang pagkakalantad sa isang taong may COVID sa 3-5 araw na ang nakaraan, lalo na kung kayo ay hindi nabakunahan.

Dahil sa masyadong nakakahawa ang Omicron variant, kung kayo ay may mga sintomas ng COVID-19 at hindi makapagpasuri:

• Ipalagay na kayo ay may COVID-19 at sundin ang mga patnubay sa pagbubukod.
• Kung ang mga miyembro ng inyong sambahayan ay may parehong sintomas, at hindi bababa sa isa sa kanila ay nasuring positibo sa COVID-19, maaari niyong ipalagay na lahat ng miyembro ay may COVID-19.

Huwag kumuha ng PCR test kung:

• Nasuri kayong positibo sa huling 30 araw.
• Nasuri na kayong positibo gamit ang rapid home test.
• Kailangan niyo ng negatibong pagsusuri para tapusin nang maaga ang pagbubukod (para diyan, gumamit ng rapid home/antigen test).

Mangyaring huwag pumunta sa Emergency Room kung kailangan LAMANG ninyo ng COVID-19 test. 

Ang Pagsusuri ay isang Kritikal na Kasangkapan sa Paglaban sa COVID-19

Ang malawakang pagsusuri ay nagbibigay ng mas tumpak na larawan kung gaano karaming mga kaso ang umiiral sa ating komunidad at tumutulong sa atin na maunawaan kung paano at saan kumakalat ang virus. Ang pagsusuri ay tumutulong sa pagtukoy sa mga taong walang mga sintomas na maaaring kumakalat ng COVID-19 upang sila ay lumayo mula sa trabaho at mga pampublikong lugar hanggang tapos na ang kanilang nakakahawang panahon. Habang ang paglabas ng resulta ay karaniwang 1-3 araw, hindi namin magagarantiya, mabigyang prayoridad o kung hindi man mapabilis ang resulta para sa pagbiyahe o iba pang mga layunin. Hindi rin namin magagarantiya na ang inyong ulat ay makakatugon sa lahat ng kinakailangan para sa lokal o internasyonal na pagbibiyahe. 

Gastos sa Pagpapasuri

Walang paunang gastos para sa pagpapasuri. Sa maraming lokasyon ng pagpapasuri, hindi niyo kailangan ang medikal na insurance upang magpasuri, subalit, kung mayroon kayong health insurance, hihilingin sa inyo na ibahagi ang impormasyong iyon. Kung magpasuri kayo sa inyong healthcare provider, maaaring kayong singilin ng isang co-pay para sa inyong pagbisita, ngunit wala kayong gastos na galing sa sarili niyong bulsa para sa mismong pagsusuri para sa COVID-19.

Pagpapasuri

Hindi niyo kailangan ng referral ng doktor o sulat upang magpasuri. Nag-aalok ang mga lokasyon ng mga naa-access na serbisyo para sa mga taong may kapansanan at sa mga may iba pang mga access o functional na pangangailangan. Sa inyong pagdating, kung kailangan niyo ng akomodasyon, alertuhan ang kawani na nasa lokasyon. 

Habang Naghihintay Kayo ng mga Resulta

• Gumawa ng mga hakbang upang maiwasan ang pagkalat, kabilang ang pananatili sa bahay, pagsunod sa pisikal na pagdistansya, pagsusuot ng tela na panakip sa mukha, madalas na paghuhugas ng kamay, at regular na paglilinis ng mga madalas na hinahawakan na kagamitan.
• Kung kayo ay may sakit, magbukod sa bahay hanggang matanggap niyo ang inyong mga resulta AT bumuti ang inyong pakiramdam. (Mag-click dito para sa mga tagubilin sa Pagbubukod ng Sarili)
• Humingi kaagad ng tulong medikal kung magsimula kayong magkasakit, lalo na kung kayo ay may problema sa paghinga, paulit-ulit na pananakit ng dibdib, magsimulang makaramdam ng pagkalito, hindi maaaring manatiling gising, o magkaroon ng mala-bughaw na labi o mukha.
• Tawagan ang inyong health provider kung ang inyong mga sintomas ay hindi gumagaling sa loob ng ilang araw. Sabihin sa kanila na nagpasuri kayo para sa COVID-19. Kung ikaw ay walang healthcare provider, tawagan ang Patient Access Department ng County sa 1 (866) 967-4677.

Departamento ng Pampublikong Pangkalusugan ng California: Mga Lokasyon ng Pagsusuri sa COVID-19 sa California

Ang Departamento ng Pampublikong Pangkalusugan ng California (CDPH) ay nagpapalabas ng mga komprehensibong mapagkukunan sa pag-access ng mga serbisyo sa pagsusuri. Kasama dito ang isang map tool upang hanapin ang libre o may mababang gastos na pagsusuri sa mga kalahok na mga lokasyon ng pagsusuri sa COVID-19 sa California. Para maghanap ng lokasyon ng pagsusuri na malapit sa inyo, mangyaring bumisita sa CDPH Testing Webpage.

Mag-ulat ng problema sa pahinang ito